Ankarada "Cənubi Qafqaz və Anadoluda türklərə qarşı erməni zülmü" mövzusunda panel təşkil olunub

MƏHƏBBƏT ALLAHVERDİYEV azturktv.az

Azərbaycanın Türkiyədəki Səfirliyinin və Türk Tarix Qurumunun birgə təşkilatçılığı ilə Ankarada “XX əsrdə Cənubi Qafqaz və Anadoluda türklərə qarşı erməni zülmü” mövzusunda panel təşkil olunub.

"Report"un Ankara bürosu xəbər verir ki, tədbir şəhidlərimizin ruhuna 1 dəqiqəlik sükut və hər iki ölkənin dövlət himnləri ilə açılıb.

Türk Tarix Qurumunun rəhbəri professor Yüksel Özgen çıxışında XX əsrdə ermənilər tərəfindən türklərə qarşı törədilmiş zülmlər mövzusuna çox toxunulmadığını ifadə edərək, ermənilərin bu qanlı fəaliyyətinin arxasında “Böyük Ermənistan” yaratmaq niyyətinin durduğunu qeyd edib.

Cənubi Qafqazda və Anadoluda ortaya çıxan kütləvi məzarların bu qətliamlara işıq tutduğunu bildirən Özgen dünyada Azərbaycan və Türkiyəyə qarşı yönəlmiş ikili standartlara da toxunub.

Azərbaycanın Türkiyədəki səfiri Rəşad Məmmədov açılış çıxışında ermənilərin tarixən müxtəlif imperialist güclər tərəfindən türklərə qarşı soyqırımlara təşviq edildiyini qeyd edib. Qondarma “erməni soyqırımı” mövzusuna toxunan səfir, hazırda da ermənilərin türklərə qarşı istifadə olunmağa davam edildiyini qeyd edib. Səfir Ermənistan və Azərbaycan arasında sülh müqaviləsinin imzalanması prosesindən də danışaraq Azərbaycanın dayanıqlı sülh üçün təşəbbüs irəli sürdüyünü, bunun üçün də gərəkli şərtlərin yerinə yetirilməsinin zəruri olduğunu ifadə edib.

Professor Hikmət Özdəmirin moderatorluğu ilə baş tutan paneldə Milli Müdafiə Universitetinin dekanı professor İbrahim Ethem Atnur, Kahramanmaraş Sütçü İmam Universitetinin professoru Toğrul İsmayıl, Yıldız Texnik Universitetinin professoru Mehmet Akif Okur və Bayburt Universitetinin dosenti Ramin Sadiq mövzu ilə bağlı ətraflı müzakirələr aparıblar.

Professor İbrahim Ethem Atnur silahlı erməni quldur dəstələrinin Şərqi Anadolu vilayətlərində törətdiyi faciələr haqqında tarixi sənədlərə əsasən danışıb və bu zülmlərin ermənilərin Türkiyədən toplu köçürülməsi üçün əsas olduğunu qeyd edib.

Professor Toğrul İsmayıl Cənubi Qafqazda törədilmiş qırğınlardan danışıb və XX əsr boyunca Azərbaycanda törədilmiş soyqırım və kütləvi qətliamlara, terror aktları və deportasiyalara, onların qurbanlarına dair statistikanı təqdim edib. O, çar Rusiyası tərəfindən aparılan “bölgəni türksüzləşdirmə siyasəti” barədə ətraflı məlumat verib.

Professor Mehmet Akif Okur “Beynəlxalq hüququda geri dönüş haqqı və məcburi köçürülən Azərbaycan türkləri” mövzusunda danışıb. O, XX əsrin əvvəllərinə aid Fransa arxivində olan xəritələrdə Zəngəzurun Azərbaycan torpağı olaraq göstərildiyini, yüzillik boyunca azərbaycanlı əhalinin tarixi torpaqlarından zorla qovulduğunu qeyd edib, geri dönüş hüququnun universal haqq olduğunu vurğulayıb, beynəlxaq hüquqi sənədlərə istinad edərək, Ermənistanın buna etirazının tam əsassız olduğunu səsləndirib.

Dosent Ramin Sadiq “XX əsrin əvvəllərində Azərbaycanda erməni vəhşilikləri” mövzusunda çıxışında tarixi faktlara əsaslanaraq çar Rusiyasının XIX əsrdə Cənubi Qafqazı işğal etməsi, Şərqi Anadolu və İrandan ermənilərin Azərbaycan torpaqlarına köçürülməsi barədə danışıb, XX əsrin əvvəlində azərbaycanlılara qarşı həyata keçirilən qırğınların təməlində məhz bu siyasətin durduğunu qeyd edib.

Panelin sonunda iştirakçıların mövzu üzrə sualları cavablandırılıb.