Moskvada Heydər Əliyev Fondunun Rusiya nümayəndəliyinin təşkilatçılığı ilə təntənəli iftar mərasimi keçirilib

MƏHƏBBƏT ALLAHVERDİYEV azturktv.az

Ramazan ayı çərçivəsində Heydər Əliyev Fondunun Rusiya Federasiyasındakı nümayəndəliyi Moskvada təntənəli iftar mərasimi təşkil edib.

“Report”un Rusiya bürosunun məlumatına görə, tədbirdə ictimaiyyət, diplomatik korpusların, elm və mədəniyyət dairələrinin nümayəndələri iştirak ediblər.

Tədbiri giriş nitqi ilə Heydər Əliyev Fondunun Rusiya Federasiyasındakı Nümayəndəliyinin Humanitar Proqramlar şöbəsinin müdiri Tamilla Əhmədova açıb. O, Fondun vitse-prezidenti Leyla Əliyevanın təşəbbüsü ilə təşkil olunan iftar süfrəsinə vaxt ayırdıqları üçün qonaqlara təşəkkür edib.

"Hesab edirəm ki, bu axşam birlik, qardaşlıq, xoş əhval-ruhiyyə ilə keçməlidir. Ramazan ayı təkcə yeməkdən, sudan çəkinmək deyil, həm də qəlbi təmizləməyə, ruhu açmağa, xeyirxah əhval-ruhiyyəyə köklənməyə çağırışdır", - T.Əhmədova deyib.

Azərbaycanda tolerantlıq və dinlərarası harmoniyaya toxunan Tamilla Əhmədova Prezident İlham Əliyevin rəhbərliyi ilə ölkəmizin regionun təkcə siyasi və iqtisadi lideri deyil, həm də mədəniyyətlərarası və dinlərarası dialoqun mühüm mərkəzinə çevrildiyini vurğulayıb.

T.Əhmədova Qarabağ məsələsinin Azərbaycan xalqı üçün həmişə ağrılı və önəmli olduğunu vurğulayıb. İndi, nəhayət, Prezident, Ali Baş Komandan İlham Əliyevin müdrik rəhbərliyi sayəsində biz bunun həllinə nail olduq”, - o qeyd edib. T.Əhmədova həmçinin Azərbaycanın Qarabağı geri qaytardığı şəhidlərinin xatirəsini yad etməyə çağırıb.

Həmçinin qeyd olunub ki, Heydər Əliyev Fondu aztəminatlılara, kimsəsizlərə, ehtiyacı olanlara dəstək istiqamətində genişmiqyaslı işlər həyata keçirir və bütün bunlar Azərbaycanın Birinci vitse-prezidenti Mehriban Əliyevanın rəhbərliyi ilə onun fəaliyyətinin kiçik bir hissəsidir.

Mərasimi Fondun nümayəndəliyinin direktor müavini Nazim İsmayılzadə davam etdirib. O, Ramazan ayının mənəvi əhəmiyyətini vurğulayaraq qeyd edib ki, bu ay insanları təmizlənməyə, mərhəmətli olmağa, xeyirxah olmağa, bir-birinə dəstək olmağa çağırır.

Tədbirdə Azərbaycanın Rusiya Federasiyasındakı səfirinin müşaviri İsmayıl Əsədov da çıxış edib, səfir Rəhman Mustafayevin səmimi arzularını çatdırıb. O, çıxışında Azərbaycan-Rusiya əlaqələrinin möhkəmlənməsində Heydər Əliyev Fondunun, eləcə də onun Rusiyadakı nümayəndəliyinin mühüm rolunu qeyd edib.

İftar bayram əhval-ruhiyyəsi yaradan, mənəvi harmoniya ab-havasını vurğulayan “Buta Trio” ansamblının musiqili çıxışı ilə davam etdirilib.