Serbiyada Xocalı soyqırımına həsr edilmiş dəyirmi masa təşkil olunub

MƏHƏBBƏT ALLAHVERDİYEV azturktv.az
Azərbaycanın Serbiyadakı səfirliyinin təşəbbüsü ilə Belqradda Xocalı soyqırımının 33-cü ildönümü ilə əlaqədar “Cənubi Qafqaz: əməkdaşlıq üçün çağırışlar və imkanlar” mövzusunda dəyirmi masa keçirilib.

azturktv.az xəbər verir ki, tədbirdə iştirak edən Türkiyə və Somalinin bu ölkədəki səfirləri, diplomatlar, Serbiyanın Xarici İşlər Nazirliyinin məsul əməkdaşı, beynəlxalq ekspertlər və siyasi təhlilçilər Cənubi Qafqazda təhlükəsizlik və əməkdaşlıq imkanlarına dair müzakirələr aparıblar.

Əvvəlcə Xocalı soyqırımı qurbanlarının xatirəsi bir dəqiqəlik sükutla yad edilib. Azərbaycanın Serbiyadakı səfiri Kamil Xasiyev Xocalı faciəsi haqqında tədbir iştirakçılarına ətraflı məlumat verib. Qeyd olunub ki, Xocalı soyqırımı Ermənistan tərəfindən planlaşdırılan və həyata keçirilən etnik təmizləmə və Azərbaycan torpaqlarının işğal siyasətinin tərkib hissəsi idi. Səfir Xocalı soyqırımını törədən şəxslərin cinayət məsuliyyətinə cəlb olunmasının vacibliyini vurğulayıb.

Sonra Beynəlxalq Münasibətlərin Təhlili Mərkəzinin (BMTM) İdarə Heyətinin sədri Fərid Şəfiyev və Xarici İşlər Nazirliyinin Təhlil və Strateji Araşdırmalar İdarəsinin rəisi vəzifəsini icra edən Şahin Şahyarov mövzu ilə bağlı fikirlərini bölüşüblər.

Tədbirdə, həmçinin Serbiya və Azərbaycanın əməkdaşlıq perspektivlərinə dair müzakirələr aparılıb. Strateji Tədqiqatlar Forumunun (FORST) prezidenti, Serbiya Milli Assambleyasının sabiq üzvü Neven Çvetiçanin Cənubi Qafqazda və onun hüdudlarından kənarda əməkdaşlıq imkanlarını təhlil edib. Nikola Tesla Universitetinin Beynəlxalq siyasət və təhlükəsizlik fakültəsinin dekanı professor Violeta Raşkoviç Taloviç isə Serbiya-Azərbaycan ikitərəfli əməkdaşlığının inkişaf perspektivlərinə toxunaraq əlaqələrin yüksək səviyyədə olduğunu və strateji əhəmiyyət daşıdığını bildirib.

Müzakirələr sual-cavab sessiyası ilə davam edib.