Pezeşkian: Xətib, Laricani və Nasirzadənin öldürülməsi bizi dərin matəmə qərq etdi - YENİLƏNİB

MƏHƏBBƏT ALLAHVERDİYEV azturktv.az

İran Prezidenti Məsud Pezeşkian kəşfiyyat idarəsinin rəhbəri İsmayıl Xətibin həlak olduğunu təsdiqləyib.

Bu barədə azturktv.az Pezeşkianın "X" hesabındakı paylaşımına istinadən xəbər verir.

"Əziz həmkarlarım İsmayıl Xətib, Əli Laricani və Əziz Nəsirzadənin, həmçinin onların bir neçə ailə üzvlərinin və yaxınlarının öldürülməsi bizi dərin matəmə qərq etdi.

Nazirlər Kabinetinin iki üzvünün, Şura katibinin, həmçinin hərbi komandirlər və "Bəsic" komandirlərinin şəhid olması ilə əlaqədar böyük İran xalqına başsağlığı verirəm. Əminəm ki, onların yolu əvvəlkindən daha möhkəm şəkildə davam etdiriləcək", - o yazıb.

14:24

İsrailin müdafiə naziri İsrael Kats İranın kəşfiyyat qurumunun rəhbəri İsmayıl Xətibin öldürüldüyünü bəyan edib.

Bu barədə azturktv.az "The Times of Israel"ə istinadən xəbər verir.

Katsın sözlərinə görə, Xətib ötən gecə İsrailin Tehrana endirdiyi zərbə nəticəsində öldürülüb.

Nazir əlavə edib ki, gün ərzində bütün cəbhələrdə gözlənilməz hadisələr ola bilər: "Bu isə İrana və "Hizbullah"a qarşı döyüş əməliyyatlarının güclənməsinə gətirib çıxaracaq".

İ.Kats, həmçinin qeyd edib ki, İsrailin Baş naziri Benyamin Netanyahu ilə birlikdə o, İsrail Ordusuna istənilən yüksək rütbəli İran rəsmisinin öldürülməsi üçün "əlavə icazə almadan" hərəkət etmə səlahiyyəti verib.

Daha əvvəl məlumat verilmişdi ki, İran kəşfiyyatının rəhbəri İsmayıl Xətib güman edilir ki, Tehrana endirilən son İsrail zərbələrinin hədəfləri arasında olub.