Gürcüstanda prezident binasına hücumla bağlı saxlanılanların sayı 62-yə çatıb

MƏHƏBBƏT ALLAHVERDİYEV azturktv.az
Tbilisidə prezident administrasiyasına hücum ilə bağlı saxlanılanların sayı 62-yə çatıb.

azturktv.az-nin Gürcüstan KİV-inə istinadən verdiyi məlumata görə, bu barədə daxili işlər naziri Gela Geladze bildirib.

O, daha 16 nəfərin saxlanıldığını qeyd edib.

Onun sözlərinə görə, saxlanılanlar "polisə hücum", "strateji obyektlərin ələ keçirilməsi və ya bloklanması", "qrup zorakılığının təşkili, ona rəhbərlik və ya iştirak" və "Gürcüstanın konstitusiya quruluşunun zorakı yolla dəyişdirilməsinə və ya dövlət hakimiyyətinin devrilməsinə çağırışlar" maddələri ilə ittiham olunurlar.

İstintaq davam edir.

Aksiya iştirakçıları oktyabrın 4-ü axşam bələdiyyə seçkiləri zamanı Gürcüstan Prezidentinin iqamətgahına girməyə çalışıblar. Toqquşmalar nəticəsində 25-ə yaxın polis əməkdaşı xəsarət alıb, onlardan 15-i xəstəxanaya yerləşdirilib.