Aİ Yunanıstan və Türkiyədən qaz tranziti üçün Ukraynanın yeraltı qaz anbarlarından istifadə etmək istəyir

MƏHƏBBƏT ALLAHVERDİYEV azturktv.az

Avropa İttifaqı (Aİ) Yunanıstan və Türkiyədən idxal olunan qazın sonradan Avropaya tranzitlə saxlanılması üçün Ukraynanın yeraltı qaz anbarlarının gücündən istifadə imkanlarını müzakirə edir.

azturktv.az “Politico”ya istinadən xəbər verir ki, yeni təşəbbüs Aİ-yə Ukraynadan qaz nəqlinin bərpasına imkan verəcək və bununla da Kiyev və Bratislava arasında Rusiya qazının Ukrayna ərazisindən Avropaya tranzitinin dayandırılmasından sonra yaranmış fikir ayrılıqlarını həll edəcək.

“Bu sxem Rusiyadan qaz almaq zərurətindən yayınmağa imkan verəcək. Bunun əvəzində Ukrayna Yunanıstan və Türkiyədən yanacaq idxalını artıracaq və öz anbarlarında 10 milyard kubmetrə qədər qaz saxlayacaq. Sonra bu həcmlər Slovakiya boru kəmərləri ilə qışda tədarükün məhdud olduğu Macarıstan kimi ölkələrə daşınacaq. Nəticədə Slovakiya yenidən tranzit ölkəyə çevriləcək”, - Avropa Komissiyasındakı (AK) mənbə bildirib.

Nəşrin mənbələri vurğulayıblar ki, Brüssel Rusiya qazının alınmasını dayandırmağa çalışır, çünki Aİ tərəfindən artıq qəbul edilmiş “REPowerEU” planı 2027-ci ilə qədər Rusiyanın enerji mənbələrindən tamamilə imtina etməyi nəzərdə tutur.

Aİ daha əvvəl Ukraynanın ən böyük yeraltı qaz anbarlarından tam istifadənin faydalarına işarə vurmuşdu. “80 %-i Aİ sərhədində yerləşən Ukraynanın qaz anbarlarının bütün potensialından istifadə edəcəyik”, - AK sədri Ursula fon der Lyayen ötən ay Kiyevə səfəri zamanı söyləyib.

Bununla yanaşı, ekspertlər yeni planın reallığına şübhə ilə yanaşırlar. Onlar xüsusilə qeyd edirlər ki, Balkan qaz kəmərləri şəbəkəsi ilə Ukraynaya maksimum 2,5 milyard kubmetr qaz tədarük edilə bilər ki, bu da nəzərdə tutulan 10 milyarddan xeyli azdır. Üstəlik, ekspertlər hesab edirlər ki, belə bir sxem iqtisadi cəhətdən sərfəli deyil və həyata keçiriləcəyi təqdirdə subsidiyalar tələb olunacaq.