BTC ilə Qazaxıstan neftinin nəqlinin 2,2 milyon tona çatdırılması müzakirə edilib

MƏHƏBBƏT ALLAHVERDİYEV azturktv.az

Qazaxıstan və Gürcüstanın baş nazirləri Oljas Bektenov və İrakli Kobaxidze bu gün Astanada keçirilən görüşdə iki ölkənin neft və neft məhsullarının dünya bazarlarına nəqli sahəsində əməkdaşlığını müzakirə ediblər.

Bu barədə azturktv.az Qazaxıstan hökumətinin mətbuat xidmətinə istinadən xəbər verir.

Qeyd olunub ki, 2024-cü ildə Bakı-Tbilisi-Ceyhan (BTC) boru kəməri ilə 1,4 milyon ton Qazaxıstan nefti nəql edilib.

"Məqsəd xammalın illik nəql həcmini mərhələli şəkildə 2,2 milyon tona çatdırmaqdır", - məlumatda bildirilib.

Danışıqlar zamanı baş nazirlər həmçinin Transxəzər Beynəlxalq Nəqliyyat Marşrutunun (TBNM, Orta Dəhliz) potensialının üzə çıxarılması yolu ilə tranzit-nəqliyyat əməkdaşlığının genişləndirilməsinə dair məsələləri müzakirə ediblər.

"Görülən tədbirlər nəticəsində 2027-ci ilə qədər Orta Dəhlizin ötürmə qabiliyyətinin ildə 10 milyon tona çatacağı gözlənilir. Bundan əlavə, rəqabətqabiliyyətli tarif şərtlərinin müəyyən edilməsi, çatdırılma müddətlərinin azaldılması və marşrutla yükdaşıma həcmlərinin artırılması istiqamətində işlərin davam etdirilməsinin vacibliyi vurğulanıb", - məlumatda qeyd olunub.

O.Bektenov gürcü həmkarına bildirib ki, 2024-cü ildə TBNM ilə daşımaların həcmi 62 % artaraq 4,5 milyon tona çatıb. Marşrutun potensialının artırılması və “dar keçidlər”in aradan qaldırılması üçün Qazaxıstan infrastrukturun, liman və terminal güclərinin təkmilləşdirilməsi, inzibati maneələrin aradan qaldırılması və daşıyıcılar üçün əlverişli şəraitin yaradılması istiqamətində iş aparır.

"Qazaxıstan hökuməti Qazaxıstan-Gürcüstan tərəfdaşlığının bütün istiqamətlərdə dinamik inkişafını təmin etmək üçün çoxşaxəli işi davam etdirməkdə qərarlıdır", - o vurğulayıb.