“Azərsu”: “Qarabağda yağış sularının idarə olunması infrastrukturu yaradılır”

MƏHƏBBƏT ALLAHVERDİYEV azturktv.az
“Füzuli və Ağdam şəhərlərində həm içməli, həm kanalizasiya, həm də yağış sularının idarə olunması sistemlərinin qurulması planlaşdırılır”.

Bu barədə “Report”a açıqlamasında “Azərsu” ASC-nin İctimaiyyətlə Əlaqələr Şöbəsinin rəisi Anar Cəbrayıllı bildirib.

Onun sözlərinə görə, Ağdam şəhərində yağış suları anbarlarda təmizlənib həm texniki su kimi, həm də yaşıllıqların suvarılması üçün istifadə oluna bilər:

“İlk dəfədir ki, hansısa şəhəri belə bir sistem tamamilə əhatə edir. Orada həm içməli, həm kanalizasiya, həm də yağış suları sistemləri yaradılır. Füzuli, Ağdam, daha sonra Cəbrayıl və digər bölgələrdə ayrılmış yağış suları infrastrukturu olacaq. Ümumiyyətlə, işğaldan azad olunmuş ərazilərdə hər bir yaşayış məntəqəsində bu sistemin yaradılması nəzərdə tutulur”.
A.Cəbrayıllı qeyd edib ki, Cəbrayılda, Zəngilanda, Qubadlıda, eyni zamanda, Kəlbəcərdə bununla bağlı layihələndirmə işləri həyata keçirilir:

“Cəbrayılda bu layihə hazırdır. Orada yeraltı sulardan istifadə olunacaq. Anbarlar, paylayıcı şəbəkələrin qurulması planlaşdırılır. Bu gün tikintisi davam edən Şuşa və Kəlbəcərdə ilkin olaraq yerüstü mənbələrdən, Laçın, Füzuli, Ağdam, Cəbrayıl, Zəngilan və Qubadlıda yeraltı mənbələrdən istifadə olunması nəzərdə tutulur. Bu işlər Dövlət Şəhərsalma və Arxitektura Komitəsinin sifarişi əsasında məskunlaşma olacaq, köçə hazırlıq görüləcək ərazilərdə icra edilir”.

Qeyd edək ki, Azərbaycan Prezidenti İlham Əliyev mayın 5-də Füzuli şəhərinin içməli su təchizatı, kanalizasiya və yağış suları sistemləri kompleksinin təməlini qoyub.