Avropa çempionatı: İki güləşçimiz erməni rəqibinə qalib gələrək finala çıxdı – YENİLƏNİB

MƏHƏBBƏT ALLAHVERDİYEV azturktv.az

Azərbaycanın yunan-Roma güləşçisi Eldəniz Əzizli Macarıstanın paytaxtı Budapeştdə keçirilən Avropa çempionatında yarımfinal görüşünə çıxıb.

55 kq-da mübarizə aparan idmanşı Ermənistan təmsilçisi Rudik Mkrtçyanla qarşılaşıb.

Rəqibinə 7:3 hesabı ilə qalib gələn Əzizli 4 illik fasilədən sonra finala vəsiqə qazanıb.

Eldənizin ardınca daha bir güləşçimiz, 63 kq-da çıxış edən Taleh Məmmədov da yarımfinal görüşünü keçirib.

Bu dəfə də rəqib erməni idmançı olub.

Hraçya Poqosyanı məğlub edən pəhləvanımız adını finala yazdırıb.

O, ilk hissədən sonra hesabda geri düşsə də, əzmkarlıq nümayiş etdirərək, yekunda qələbə qazanıb - 3:1.

16:59

Macarıstanın paytaxtı Budapeştdə keçirilən Avropa çempionatında 4 yunan-Roma güləşçimiz yarımfinala yüksəlib.

azturktv.az xəbər verir ki, Eldəniz Əzizli (55 kq) yarışa 1/4 finaldan start verib. Titullu güləşçimiz rumıniyalı Denis Mihaya ilk hissədə tam üstünlüklə qalib gəlib – 8:0. Eldəniz yarımfinalda Rudik Mkrtçyanla (Ermənistan) üz-üzə gələcək.

Taleh Məmmədov (63 kq) yarışa 1/4 finaldan qoşulub. Təcrübəli pəhləvanımız türkiyəli Ahmet Uyardan üstün olub – 5:1. Taleh yarımfinalda Qraçya Poqosyanla (Ermənistan) qarşılaşacaq.

Sənan Süleymanov (77 kq) 1/8 finalda rumıniyalı İlye Kojokariyə heç bir şans tanımayıb – 9:0. Süleymanov növbəti mərhələdə dünya çempionu Malxas Amoyanla (Ermənistan) gərgin keçən görüşdə minimal fərqlə (5:6) uduzub.

İslam Abbasov (87 kq) ilk mərhələdə xorvat Matey Mandiçə minimal fərqlə (4:3) qalib gəlib. Həmyerlimiz 1/4 finalda dünya çempionu və Tokio Olimpiadasının bürünc medalçısı Zurab Datunaşviliylə (Serbiya) gərgin keçən mübarizədən 5:3 hesablı qələbəylə ayrılaraq adını yarımfinala yazdırıb. İslam final yolunda Niku Ojoqu (Rumıniya) sınağa çəkəcək.

Beka Kandelaki (130 kq) Avropa çempionatına inamlı qələbəylə start verib. Təmsilçimiz ilk görüşdə ukraynalı Mixail Vişnevitskiyə vaxtından əvvəl (10:0) qalib gəlib. Kandelaki 1/4 finalda David Ovasapyanı (Ermənistan) 5:1 hesabıyla məğlub edərək yarımfinala yüksəlib. Beka finalın bir addımlığında dəfələrlə dünya və Avropa çempionu olmuş, üçqat olimpiya medalçısı Rıza Kayaalpla (Türkiyə) qarşılaşacaq.

Qeyd edək ki, yarımfinal görüşləri Bakı vaxtı ilə saat 18:45-də başlayacaq.

10:18

Macarıstanın paytaxtı Budapeştdə keçirilən Avropa çempionatında bu gün yunan-Roma güləşi üzrə yarışlara start veriləcək.

azturktv.az-ın xəbərinə görə, bu gün 10 güləşçimizdən yarısı – 5-i mübarizəyə qoşulacaq.

55 kq. Eldəniz Əzizli – Denis Mihay (Rumıniya)/Stefan Qriqorov

63 kq. Ahmet Uyar (Türkiyə)/Kristian Keçkemeti (Macarıstan) – Taleh Məmmədov

77 kq. Sənan Süleymanov – İlye Kojokari (Rumıniya)

87 kq. Matey Mandiç (Xorvatiya) – İslam Abbasov

130 kq. Beka Kandelaki – Mixail Vişnevitski (Ukrayna)

Həmçinin bu gün qadın güləşçilərimizdən Elis Manolova (65 kq) final görüşünə çıxacaq. Azərbaycana Avropa çempionatında yeganə medalı qazandıran Bolqarıstan əsilli idmançımızın rəqibi Tatyana Rijko (Ukrayna) olacaq. Bu, Elisin dördüncü qitə çempionatının finalıdır. O bu gün qalib gəlsə, ikinci dəfə Avropa çempionluğunu qeyd edəcək, məğlub olsa, üçüncü dəfə gümüş medalla kifayətlənəcək.