BƏƏ-nin “Masdar” şirkəti və “Azərbaycan Dəmir Yolları” QSC Anlaşma Memorandumu imzalayıb - FOTO

MƏHƏBBƏT ALLAHVERDİYEV azturktv.az
Martın 15-də Gülüstan sarayında keçirilən 230 MVt gücündə “Qaradağ” Günəş Elektrik Stansiyasının təməlqoyma mərasimi çərçivəsində Birləşmiş Ərəb Əmirliklərinin “Masdar” şirkəti ilə “Azərbaycan Dəmir Yolları” QSC arasında “Bərpa olunan enerji və enerji səmərələliyi sahəsində əməkdaşlığa dair” Anlaşma Memorandumu imzalanıb.

QSC-dən verilən məlumata görə, Memorandumun əsas məqsədi tərəflərin dəmir yolu sektorunda bərpaolunan enerji mənbələrindən istifadə imkanlarının araşdırılması niyyətini rəsmiləşdirmək və inteqrasiya edilmiş enerji səmərəliliyi proqramını həyata keçirməkdir.

Əməkdaşlığın əsasını “Masdar” şirkəti tərəfindən “Azərbaycan Dəmir Yolları” QSC ilə koordinasiya və tərəfdaşlıq əsasında Azərbaycan dəmir yolları sektorunda bərpa olunan və təmiz enerji layihələrinin (günəş və külək enerjisi) potensial inkişafının araşdırılması, texniki və kommersiya cəhətdən mümkün olan bərpaolunan enerji layihələrinin müəyyən edilməsi təşkil edəcək.

Xatırladaq ki, bunadək yaşıl enerjinin ümumi enerji istehlakında payının artırılması və enerji sərfiyyatının səmərəlilik hesabına azaldılması istiqamətində “Azərbaycan Dəmir Yolları” QSC-də bir sıra tədbirlər həyata keçirilib. Belə ki, ölkənin sosial-iqtisadi inkişafına dair 5 Milli Prioritetindən biri olan “Təmiz Ətraf Mühit və Yaşıl Artım” ölkəsinin qurulması prioritetinə uyğun olaraq “Azərbaycan Dəmir Yolları” QSC-nin layihələndirilmiş 10 illik Korporativ strategiyası çərçivəsində yaşıl enerjinin ümumi enerji istehlakında payının artırılması, enerji və yanacaq sərfinin azaldılması və “Yaşıl maliyyələşmə” ilə bağlı təşəbbüslər strateji prioritetlər olaraq müəyyən edilib. “Şərq-Qərb” və “Şimal-Cənub” beynəlxalq nəqliyyat dəhlizlərinin ölkə ərazisindən keçən hissələrində dəyişən cərəyana keçidlə bağlı tikilən dartı yarımstansiyalarının istismarı mövcud sistemə nəzərən 30%-dək daha az enerji sərfiyyatına imkan verəcək.

Bərpaolunan enerjinin istehsalı üçün dəyişən cərəyanla işləyən lokomotivlərin texniki baxış və təmirinin həyata keçirilməsi məqsədi ilə yeni inşa edilmiş Biləcəri lokomotiv deposunda gücü 66 Kvt olan 147 ədəd günəş paneli və isitmə məqsədi ilə 160 ədəd günəş paneli, yeni inşa edilmiş Gəncə lokomotiv deposunda isə gücü 66 Kvt olan 210 ədəd günəş paneli və isitmə məqsədilə 140 ədəd günəş paneli quraşdırılıb.

Bundan başqa, Avropa Yenidənqurma və İnkişaf Bankının dəstəyi ilə həyata keçirilmiş texniki yardım layihəsi çərçivəsində 2019-cu ildə beynəlxalq məsləhətçi şirkət tərəfindən hazırlanmış “ADY-də elektrik enerjisinin satışı, yenilənmə və enerji səmərəliliyi üzrə ilkin texniki-iqtisadi əsaslandırma” hesabatında elektrik enerjisinin idarə edilməsi və kommersiyalaşdırılması, enerji səmərəliliyi və bərpa olunan enerji istehsalı, eləcə də əsas əməliyyat istiqamətləri üzrə prioritet investisiya planlarına dair təhlillər edilib.

Eləcə də Asiya İnkişaf Bankı ilə birgə həyata keçirilən “Dəmir Yolu Sektorunun İnkişafı Proqramı” çərçivəsində elektrik, yanacaq və digər enerji resursları sərfinin azaldılması məqsədilə bir sıra islahatlar aparılıb.