Hakan Fidan: Çoxsaylı problemlərin olduğu bölgədə Türkiyə və Azərbaycan iki sabitlik adasıdır

Bir çox problemin yaşandığı bölgədə Türkiyə və Azərbaycan iki sabitlik adası mövqeyindədir.

azturktv.az xəbər verir ki, bunu Türkiyənin xarici işlər naziri Hakan Fidan "X" sosial media hesabında yazıb.

O xatırladıb ki, qlobal problemlər və regional proseslər qarşısında hər zaman əməkdaşlıq və həmrəylik içində olduqları qardaş və müttəfiq Azərbaycana mühüm səfər həyata keçirib:

"Bakının işğaldan azad edilməsinin 108-ci ildönümündə Azərbaycanda olmaq gözəl bir təsadüf oldu. Səmimi qonaqpərvərliyinə görə, başda dəyərli həmkarım və qardaşım Ceyhun Bayramov olmaqla bütün azərbaycanlı rəsmilərə təşəkkür edirəm.

Səfər çərçivəsində Azərbaycan Prezidenti İlham Əliyev tərəfindən qəbul edildik və xarici işlər naziri Ceyhun Bayramovla geniş müzakirələr apardıq.

Bölgəmizdəki böhranları dəyərləndirdik, Cənubi Qafqazda davamlı sülh, sabitlik və rifahın təmin olunması, eləcə də Türk dünyasının ortaq gələcəyi ilə bağlı fikir mübadiləsi apardıq.

İqtisadi və ticari əlaqələrimizi daha da inkişaf etdirəcək addımları, enerji və nəqliyyat sahələrində birgə layihələrimizi, həmçinin təhlükəsizlik sahəsində əməkdaşlığımızı müzakirə etdik".

H.Fidan, həmçinin vurğulayıb ki, Türkiyə qardaş Azərbaycanla əməkdaşlığı daha da dərinləşdirməyə, ortaq hədəflər naminə çiyin-çiyinə irəliləməyə davam edəcək.

Qeyd edək ki, Türkiyənin xarici işlər naziri Hakan Fidan sentyabrın 15-də Azərbaycana səfər edib. O, səfər çərçivəsində Prezident İlham Əliyev tərəfindən qəbul edilib, həmçinin Azərbaycanın xarici işlər naziri Ceyhun Bayramovla görüşüb. Hər iki nazir görüşün ardınca mətbuat üçün brifinqdə çıxış ediblər.

MƏHƏBBƏT ALLAHVERDİYEV azturktv.az