Şəhid ailələri daim diqqət mərkəzindədir.

MƏHƏBBƏT ALLAHVERDİYEV azturktv.az
Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun möhtəşəm Zəfərlə başa vurduğu 44 günlük Vətən müharibəsindən sonra dövlət başçısının tapşırığına əsasən, respublikanın hər yerində olduğu kimi Cəlilabad rayonunda da şəhid ailələri üzvləri, qazilərlə bağlı geniş miqyaslı sosial dəstək işləri aparılır.
Rayon icra hakimiyyətinin nəzarəti ilə rayonda həssas təbəqədən olan vətəndaşlara göstərilən qayğı nəticəsində 200 nəfərdən artıq şəhid ailəsi üzvü və qazi işlə, 59 şəhid ailəsi üzvü, 2 müharibə əlili, 65 nəfər müharibə iştirakçısı və ya onun ailə üzvü özünüməşğulluq proqramı ilə təmin olunmuş, 65 qazi reablitasiya mərkəzlərinə göndərilmiş, 12 şəhid ailəsinin üzvləri ödənişsiz cərrahi əməliyyat olunmuşdur. Şəhid ailələrinin yaşadıqları küçələr abadlaşdırılmış, işıq, qaz təminatında olan problemlər həll edilmişdir.
Şəhid ailələrinin, müharibə əlillərinin mənzil-məişət şəraitinin yaxşılaşdırılması tədbirləri geniş vüsət almaqla, bu kateqoriyalardan olan şəxslərin mənzil və fərdi evlə təminatı proqramı 2021-ci ildə 5 dəfə genişlənib. Dövlət başçısının 25 yanvar 2021-ci il tarixli Sərəncamı ilə 2014-2019-cu illərdə uçota alınmış şəxslərin və 2020-ci ildə hərbi əməliyyatlar, o cümlədən Vətən müharibəsi zamanı şəhid olanların ailələrinin, müharibə əlillərinin 5 il ərzində mərhələli şəkildə 11 min mənzil və ya fərdi evlərlə təmin olunması nəzərdə tutulub. Cəlilabad rayonunda da 72 qazi və 98 şəhid ailəsi ev növbəsi üçün rayon icra hakimiyyətində qeydiyyatdan keçmişdir.
Orden və medallarla təltif edilmiş şəhidlərin adlarının əbədiləşdirilməsi məqsədilə 7 küçəyə adların verilməsi üçün rayon icra hakimiyyəti başçısı tərəfindən sərəncam verilmiş, 12 məktəbə adların verilməsi üçün Nazirlər Kabineti qarşısında vəsatət qaldırılmışdır. Vətən Müharibəsi qəhrəmanı Rəşad Abdullayevin adı Cəlilabad şəhər 2 saylı tam orta məktəbə verilmişdir.
Cəlilabad rayonunda daim vətəndaşların problemləri ilə maraqlanılır, mütəmadi olaraq şəhid ailələri, qazilər və ailə üzvlərinin birdəfəlik maddi yardımla, ərzaqla təmin olunmaları, stasionar müalicə alan və ya əməliyyat olunan, eləcə də problem yaranan ailələrdə həssas yanaşma tələb edən vəziyyətlər hər zaman rayon icra hakimiyəti tərəfindən diqqətdə saxlanılır.