“Azərbaycan dili və ədəbiyyatı” Forumu başa çatıb - YENİLƏNİB + FOTO

MƏHƏBBƏT ALLAHVERDİYEV azturktv.az

Ümummilli lider Heydər Əliyevin 100 illik yubileyinə həsr olunan tədbirlər çərçivəsində Heydər Əliyev Fondu və Mədəniyyət Nazirliyinin təşkilatçılığı, Elm və Təhsil Nazirliyi, Azərbaycan Milli Elmlər Akademiyasının dəstəyi ilə ölkəmizdə ilk dəfə keçirilən Azərbaycan Dili və Ədəbiyyatı Forumuna yekun vurulub.

Oxu.Az xəbər verir ki, tədbirdə Mədəniyyət Nazirliyinin nümayəndələri, millət vəkilləri, elm, ədəbiyyat və mədəniyyət xadimləri və digər qonaqlar iştirak edib.

M.F.Axundzadə adına Azərbaycan Milli Kitabxanasının 100 illik yubileyinə həsr olunmuş videoçarx nümayiş etdirilib.

Forumun V panel iclası “Dəyərlər və etik davranış kodeksləri: kitabın fərdi və sosial həyatda əhəmiyyəti və funksiyaları” mövzusuna həsr olunub.

“Azərbaycanda kitab sənayesi: mövcud vəziyyət və hədəflər”, “Ölkəmizin kitab bazarına daxil olan xarici ədəbiyyatın milli dəyərlər və düşüncə sisteminə təsiri”, “Kitab satışı sistemi: innovativ həllər və kredit mexanizmləri”, “Kitab sənayesinin inkişafına dövlət dəstəyinin mexanizmləri” və “Vətəndaşların ədəbi, elmi və informasiya tələbatının ödənilməsində Azərbaycan Milli Kitabxanasının üzərinə düşən vəzifələr” mövzularında çıxışlar dinlənilib.

Daha sonra Azərbaycan ədəbiyyatına həsr olunan videoçarx nümayiş olunub. Materialda Ulu öndər Heydər Əliyevin ədəbiyyatımıza qayğısını əks etdirən fraqmentlər də yer alıb.

Çıxışçılar forumu yüksək qiymətləndirib, layihənin hər il keçirilməsinin vacibliyini qeyd ediblər.

Panelin sonunda müzakirəyə çıxarılan mövzular üzrə sual-cavab olub, xatirə şəkli çəkdirilib.

13:43

Bakıda “Azərbaycan Dili və Ədəbiyyatı” Forumunun son günü başa çatıb.

Oxu.Az xəbər verir ki, forumda ölkənin tanınmış yazıçı və şairləri, ədəbiyyatşünasları, dilçi alimləri, filoloqları və ictimaiyyət nümayəndələri iştirak edib.
Ümummilli Lider Heydər Əliyevin 100 illiyi çərçivəsində keçirilən forum Heydər Əliyev Fondunun, Mədəniyyət Nazirliyinin təşkilatçılığı, Elm və Təhsil Nazirliyi, eləcə də Azərbaycan Milli Elmlər Akademiyasının dəstəyi ilə baş tutub.

Qeyd edək ki, forumun açılışı Şamaxı şəhərində, digər iki günü isə Bakıda “Gülüstan” sarayında keçirilib.

11:30

Bu gün “Azərbaycan dili və ədəbiyyatı” Forumunun üçüncü günü başlayıb.

Oxu.Az-ın məlumatına görə, forum Gülüstan sarayında keçirilir.

Ümummilli lider Heydər Əliyevin 100 illiyi çərçivəsində keçirilən forumun təşkilatçısı Heydər Əliyev Fondu, Mədəniyyət Nazirliyi, dəstəkçisi isə Elm və Təhsil Nazirliyi, eləcə də Azərbaycan Milli Elmlər Akademiyasıdır.

Forumda ölkənin tanınmış yazıçı və şairləri, ədəbiyyatşünasları, dilçi alimləri, filoloqları və ictimaiyyət nümayəndələri iştirak edir.

Qeyd edək ki, forumun açılışı Şamaxı şəhərində olub.